ياعالم ياهوووه .. التعليم زحلقوووه

[قلم]

بفضل الله ــ سبحانه وتعالي ــ عدنا .. ومعكم بعد الفاصل

آآآخ العملية وسعت قوي قوي .. وزحلقت منهم عالآخر .. ووصلت للتعليم اللي هو المفروض اساس تقدم اي دولة .. ايه بقي اللي حصل :
بص ياسيدي اللي حصل .. إن عمو ( الجمل ) ( حشر ) دماغه في الموضوع وقال اننا هنطبق نظام جديد للثانوية العامة .. نظام ايه يا أونكل قول ماتكسفش .. خد بالك انت معايا .. وشوف النظام ده عبارة عن ايه .

يعني شوية سمك علي لبن علي تمر هندي .. الجمل قال : احنا هنعمل الثانوية العامة سنة واحدة ( الله اكبر ) حلو .. طيب وبعدين يا اونكل جمل .. وبعدين يا اطفال هنعتبرها شهادة شبه نهائية بمعني ان من الممكن العمل بيها .. وبكده هتتعدل شوية بنود في قانون العمل .

والسؤال المهم هو : طيب فين الجامعة .. قالنا متستعجلوش ياحبايبي : انا جايلكوا في الكلام : طبعا بكده مفيش مجاميع للكليات واللي عايز يكمل في الجامعة مفيش مشكلة يكمل .. بس لازم يجتاز اختبار الكلية .. واللي مش عايز يكمل .. يروح يتزحلق في المولد


طيب تعالوا نشوف اللي ممكن يحصل .. تخيلوا معايا كده .. مع اعتقادي أنه لا قيود علي دخول الجامعات إلا الاختبار :

ــ أعداد العاطلين هتزيد ( بالعبيط ) وهذا هو المطلوب اثباته

ــ وسع بقي .. الوسايط هتلعب دورها .. ياسلام بقي عندك واحد لايفقه شئ في الطب ولا حتي عنده ( سينس ) عن مهنة الطب .. تلاقيه معاه فلوس ( يرش ) ويبقي دكتور قد الدنيا .. وبالتالي هتزيد اعداد الناس اللي بتموت .. وهذا هو المطلوب اثباته .
وعندك برده نفس الكلام في الهندسة .. يطلعلك واحد معتوه مهندس معماري ويبنيلك عمارات .. وفي الاخر تقع .. والناس الغلابة تموت .. وهذا هو المطلوب اثباته

ــ الميزة الوحيدة اللي ممكن تتحقق في الموضوع ده .. انهم هيقدروا لحد كبير ( يكتفوا ) الدروس الخصوصية .. ههههههههه بس هتخرم من ناحية تانية .. هيفتح مجال الدروس في الجامعة ههههههههههههههه

وتحيا مصر .. وعاشت للمصريين

مع تحيات قلم

ونلتقي بعد الفاصل .. إن شاء الله