الدنيا زحمة كده ليه

[سمسمة]

زحمة يا مصر زحمةةةةة


لأأأأأأأأأأأأأأأأأأأأأأأأأأأأه حرااام بجد اللى بيحصل فى البنى آدميين ده حراام،، مش ممكن لأه لأه يعنى، يا جدعان القاهرة بتنفجرر، لأ بتنفجر إيه ، انفجرت فعلا، و على فكرة انا بنقل الكلام ده من هنا يعنى فروم هيير من قلب المعركة ، كل ده ليه!!! ببساطة عشان قلبى طاوعنى و مشى على هوايا و وافقنى انى أركب المترو....
بجد إيه ده، زحام غير طبيعى لإن المترو بيجى كل 8 ساعات و أحيانا بأه، لا لا أحيانا إيه ده على طول، تلاقى مثلا تلات قطرة من الجيزة بيخدم عليهم مترو واحد بس من خط حلوان أو المرج... طبعا اللى مش بيركب المترو و بيكره فرحان فيا انا و أمثالى.. بس عادى ولا يهمنى.. قال يعنى( قال إيه) الطريق فوق سالك... يا راجل؟؟ طب عينى فى عينكو كده...
يعنى الطرق على طووووول زحمة ، كوبرى اكتوبر، مصر الجديدة، مدينة نصر، الجيزة ، عاديين ،العتدة( سورى العتبة) ( بتكلم بجد على فكرة) ، و إيه لا تقوللى خميس و لا جمعة و لا ويك إند ولا ويك هند و لا أى بتاع، هى واقفة تلات سبت جن أزرق جن برتقانى، واقفة يا عم الحاج....
ركبت مترو هتتبهدل، أتوبيس هتتبهدل ( كويس اوى لو لقيت إيد أو رجل متبقيين لك لما تتطلع، ده طبعا لو لو لو طلعت منه أصلا) يعنى هتتبهدل بردو، موكروباظ بردوو هتتبهدل ( ولا إيه فين الباشمهندزين اللى هنا) (((إلا صحيح هما ليه بيقولو موكروباز و مش بيقولو اتوبيز)
طبعا معدل البهدلة و كره العيشة بيقل تدريجيا مع امكانية تملكك سيارتك الخاصة( على اساس ان 99% عنده عربية أولهم انا طبعا) بس بحب انى انزل للطبقة العاملة....و مش هتحسوا بالكلام ده إلا لما تجربوا المترو الساعة 6 و نص المغرب، أو المواصلات بشكل عام من الساعة 8 الصبح ل 9 بليل...أصل ربنا يخليهم لمصر لما لقوا ان الناس بتستخدم المترو كتير الوقت ده قالو اما نذِّل فيهم شوية و نأخر المترو هىههىهىهىه....أففف بجد يعنى

يجى واحد ظريف جدا من اللى أعضاء فى حزب مصر الفتاة، يقولى : ما يعنى إنتو اللى قاعدين تجيبوا فى عيال،، و احنا بنقولوكو براحة مش كده، ربنا عرفوه بالعقل ،ليه تخلف اتنين لما ممكن تخلف ربع...البلد خلاص مش قادرة مصر بتصوت منكو،
واحد زى ده ابسط حاجة اقولهاله ( ده فى حالة لو كان عندى وقت فراغ زى حالاته و رديت عليه اصلا) هقوله يابنى يا حبيبى اليابان بدءت بعدينا بقد إيه بعد هيروشيما و ناجازاكى ( ده لو كان سمع عنهم اصلا) و مساحتها أصغر مننا حوالى 377,835 كم مربع،لأ وايه سكانها 128 مليون و احنا زعلانين اوى اننا بقينا 80 مليون...، شوف يا عم الصين بتتعامل بالمليار عدت مرحلة الملايين دى لأ بل عدت المليار نفسها بالظبط بالظبط 1.307 مليار و أى خدعة، هتقولى ماهى الصين أكبر من مصر، هقولك فى حاجة جديدة اخترعوها اسمها نسبة و تناسب ...
دول ناس عرفو يعنى ايه ثروة بشرية عرفوا يستفيدو من الناس، عرفو يعنى ايه تعليم، مش احنا فرحانيين اوى ان مصر الجديدة فيها مكتبة علشان أطفال مصر الجديدة و لا يعينى الأطفال فى المعادى بيعاناو من نقص اللاب توبات اللى فى المدارس.... عرفوا يعنى إيه احترم آدمية اللى قدامى عشان يبقى كائن منتج....
ما علينا، شكلى بعدت عن الموضوع الأصلى و عن المتروو ان شاء الله احنا اللى هنعمُّر الصحرا يا جدعااان......و

[سمسمة]

انا عايزة رد ع الموضوع ده اكيد ككلكم بتعانوا زي

[Hard_Girl]

ولسة احنا كدة لسة مشوفناش حاجة

دي الايام الجاية هتبقي احلي واحلي

وشكرا علي مجهوداتك الرائعة يا سمسمة

[سمسمة]

العفو ياhardgirlعلي استجابتك لطلبي وشكرا لاهتمامك
وعلي رأيك لسه ياما هنشوف

[EMO]

يعنى جبت سيرة كل الناطق ونسيتى المحور والدائرى ليه؟ يخونك 5 سنين عذاب يا ظالمة يعنى مش فاكرة لما كنت معاكو وكان الطريق زحااااااااااام وانتى فاهمة وعلى العموم الموضوع تحفة وربنا يخايكى زخرا لمصر

[سمسمة]

المحور ده ياايمو عايز موضوع لوحده دي معاناة 5 سنين لايمكن تنسي طبعا
بس خلاص اتخرجنا والزحمة خفت من المحور لانه اتصلح بعد ما مشينا

[Mero]

ههههههههههه
موضوع لذيذ مووووووت
الزحمة دي كارثة من كوارث الزمن انا بقيت مبركبش غير تاكسي عشان قرف المواصلات العامة المشكلة مش بس ف مترو ولا اتوبيس ولا مكروباص المشكلة في ان في حنفيات ناس عمومية بتنفجر كل يوم في الشوارع فوق نلاقي الاتوبيس مفيش مكان ع السلم والميكروباص كله فوق بعض والناس مليه الشوارع
اما تحت فالمترو بيكون اللهم احفظنا محشورين في بعض ومفيش تكييف والدنيا خنقة والروائح فظيعة
دي ازمة حتي قانون المرور الجديد دههه مش هيقدر عليها دا احنا 75 مليون ومحشورين اغلبهم في القاهرة
ماتيجوا نعمر الصحراء ههههههههههههههههههههههههه